NAUPANG HNENAH HRI DANNA THA ZAWK PE DAWN

The Aizawl Post

02-October-2015

Hriselna lama hmalakna thar atan naupang/nausen hnena hri danna pek dan tha zawk India ram pumah kalpui tum a ni a, Mizoram-ah pawh kumin chhungin kalpui tura inbuatsaih mek a ni.
He programme thar tur - Pentavalent vaccine leh Inactivated Poliovirus Vaccine (IPV) hi India ramah a thawhkhatna atan state 16-ah kalpui a ni tawh a, a thawhnihna turah hmarchhak state te an tel ve avangin Ministry of Health & FW hnuaia Regional Resource Centre (NE) leh UNICEF tangkawp chuan September 29 khan Guwahati-a Indian Institute of Bank Management hmunah department-a thawktute leh journalist te tan a zirchianna leh inhrilhhriatna a buatsaih a, hmarchhak state tin atangin Health department thawktute leh chanchinbumite an kalkhawm a, Mizoram atang pawhin Immunization lam changtu medical officer Dr. Vanlalrengpuia hoin an tel a ni.

Nausen ten hri danna hrang hrang, a hrang theuha an lak thin chu tum khatah an lak theih nan sawrkarin damdawi tha zawk a siam zel a, tunah hian hri 5 - diptheria, pertusis leh tetanus (DPT) te leh Hepatitis B hri danna an lak thin bakah, pneumonia leh meningitis te kai tirtu hib-B (haemophilus influenzae type b) danna telh tharin 'Pentavalent Vaccine' hi a hmang thar dawn. Hri chi hrang hrang venna atana nausen chiu nawn fo ngai lo tura he vaccine thar hi duan a ni. Hetihrual hian tuna Hepatitis B leh DPT venna lak kal mek chu a kal ngaiin a kal tlang rih dawn tih workshop huaihawttu RRC-NE leh Unicef a mithiamte chuan an sawi.

IPV hi zeng hri venna tha zawk ni tura duan leh ruahman a ni a. Tuna kaa thlawr - Oral Polio Vaccine thlaktu tur niin a chiu-a chiu tur a ni thung ang. Hei hi khawvel atanga zeng hri umbona tura ruahmanna thar leh tha zawk tura ngaih niin, kum 2019-2020 ah chuan OPV hi thlak fel a, IPV hmanga India ram chu zeng hri laka him hman tura beisei a ni, an ti.

Heng vaccine thar te hi tuna hman mek aia a man sang lutuk lo tura ruahman a ni a. Mizoram ah chuan pentavalent vaccine hi October 15 atanga hman hman tura inruahman mek niin, IPV pawh hi November thla vela hman tura inbuatsaih mek a ni bawk. Health department hotute chuan, nausen zawng zawngin heng hri danna hi an lak vek theih nan sum lama harsatna awm lo tura theihtawpa hma lak chhoh mek a nih thu an sawi.

Heng vaccine te hi thil thar a ni tawh hran lo a, India ramah pawh state thenkhatah chuan hman reng tawh niin India ram puma hman turin India sawrkarin a tih avangin tunah hian inbuatsaih kalpui zel a ni tih official te hian an sawi a ni.